Sunday, October 2
Shadow

Tennis: u Rwanda rurashaka kuba igicumbi cy’amarushanwa

Kuva kuri uyu wa gatatu tariki 27 Mata 2022 kugeza ku cyumweru tariki 1 Gicurasi 2022 mu Rwanda hazaba harimo kubera irushanwa rihuza ibihugu bigize Afurika y’i Burasirazuba ku bakinnyi batarengeje imyaka 12.

Muri iyi mikino irimo kubera kubera ku bibuga byo mu Ishuri ry’Imyuga n’Ubumenyingiro IPRC Kigali amakipe yaserutse ni u Rwanda, Uganda, u Burundi, Kenya na Tanzaniya. Buri kipe igizwe n’abakinnyi batatu ku makipe y’abahungu no ku makipe y’abakobwa. Ku ruhande rw’u Rwanda, Aimable Ndejuru Visi Prezida w’Ishyirahamwe ry’Umukino wa Tennis mu Rwanda akaba ari na we mutoza mukuru w’iyi kipe y’igihugu irimo kurushanwa avuga ko imyiteguro yagenze neza kuko abana bakoze imyitozo mu gihe kingana n’ibyumweru bine hibandwa ku kuzamura urwego mu buhanga, amayeri y’umukino no kugira imyumvire igamije intsinzi.

Abayobozi b’Ishyirahamwe ry’Umukino wa Tennis mu Rwanda mu kiganiro n’itangazamakuru

Valens Habimana Umunyamabanga Mukuru w’Ishyirahamwe ry’Umukino wa Tennis mu Rwanda ari na we ufite inshingano z’umuyobozi w’iri rushanwa rizamara iminsi itanu (Tournament Director) ashimangira ko muri iyi mikino buri gihugu kizajya gihura n’ikindi hanyuma ikipe izaba iya mbere mu bahungu ndetse n’amakipe azaza mu myanya ibiri ya mbere mu kiciro cy’abakobwa akazahagararira akarere k’Afurika y’i Burasirazuba mu irushanwa nyafurika.

Jedekia Niyibizi umukinnyi w’Umunyarwanda watangiye yitwara neza

Umuyobozi w’Ishyirahamwe ry’Umukino wa Tennis mu Rwanda Théoneste Karenzi yabwiye itangazamakuru ko intego bafite ari iyo gukora ibishoboka byose u Rwanda rugahinduka igicumbi cy’amarushanwa atandukanye ya Tennis mu rwego rwo kuzamura urwego rw’imikinire y’abakinnyi b’Abanyarwanda no kumenyekanisha isura y’igihugu.

Jean Claude MUNYANDINDA

Leave a Reply

Your email address will not be published. Required fields are marked *