Tuesday, May 24
Shadow

BAL 2022:Muri Playoff ikipe ya REG Basketball Club izahura na FAP

 

Ku wa kabiri ku itariki ya 19 y’uku kwezi kwa kane ni bwo i Kayiro mu Misiri harangiye imikino yahuzaga amakipe 6 yo mu itsinda rya Nili, mu irushanwa rya Basketball Africa League ry’uyu mwaka wa 2022.

Muri iyi mikino yari yatangiye ku itariki ya 9 y’uku kwezi, amakipe yari yaserutse ni Zamalek yo mu Misiri yakiniraga mu rugo, Petro de Luanda yo muri Angola, Cape Town Tigers yo muri Afurika y’Epfo, Forces Armées et Police yo muri Kameruni, Cobra Sports yo muri Sudani y’Epfo na Espoir Fukash yo muri Repubulika Iharanira Demokarasi ya Kongo.

Nyuma y’iyi mikino yo mu itsinda rya Nili, aho buri kipe yakinnye imikino itanu, ikipe yaje ku isonga ni Zamalek yo mu Misiri ifite amanota 10 ku 10. Ibi birashimangira ko kabuhariwe Anas Mahmoud, Moustafa Elmekawi, Diogu Ikechukwu na bagenzi babo bafite inyota yo kwiyongeza igikombe cya BAL begukanye umwaka ushize ubwo cyakinirwaga ku nshuro ya mbere.

Ku mwanya wa kabiri hari Petro de Luanda yo muri Angola. Mu mikino itanu abasore b’umutoza w’Umunyaburezili José Neto bakinnye, batsinze ine batakaza umukino umwe wabahuje na Zamalek yo mu Misiri, ari na byo byatumye bagira amanota 9 ku 10.

Ikipe yabaye iya gatatu muri iri tsinda rya Nili ni Cape Town Tigers yo muri Afurika y’Epfo yarangije ifite amanota 7 ku 10 nyuma yo gutsinda imikino ibiri igatakaza itatu. Abakinnyi bayo nka Mick Kabongo, Billy Preston, Pieter Prinsloo na bagenzi babo berekanye ko iyi kipe imaze kugera ku rwego rushimishije n’ubwo yabonye itike yo gukina iki kiciro mu buryo butavuzweho rumwe.

Ikipe ya Forces Armées et Police yo muri Kameruni yabaye iya kane n’amanota 7 ku 10, na yo ibona uburenganzira bwo kwinjira muri kimwe cya kane k’irangiza mu mikino ya kamarampaka izabera mu Rwanda mu kwezi kwa gatanu.

Amakipe 2 asigaye ari yo Cobra Sports yo muri Sudani y’Epfo na Espoir Fukash yo muri Repubulika Iharanira Demokarasi ya Kongo, urugendo rwayo rwarangiriye i Kayiro mu Misiri kuko yatsinze umukino umwe rukumbi mu mikino itanu.

Amakipe ane yazamukiye mu itsinda rya Nili ari yo Zamalek, Petro de Luanda, Cape Town Tigers na Forces Armées et Police aje yiyongera ku yandi makipe ane yo mu itsinda rya Sahara aherutse gukatisha amatike yo kuzakina playoff ari yo REG Basketball Club yo mu Rwanda, US Monastir yo muri Tuniziya, AS Salé yo muri Maroke na Seydou Legacy Athletic Club yo muri Gineya.

Imikino ya kamarampaka ari na yo izagaragaza ikipe izegukana igikombe cya BAL izabera muri Kigali Arena i Remera kuva ku itariki ya 21 kugeza ku ya 28 y’ukwezi kwa gatanu. Muri kimwe cya kane k’irangiza, ku wa gatandatu tariki ya 21 guhera i saa saba n’igice ku isaha y’i Kigali ikipe ya REG Basketball Club izahura na Forces Armées et Police (FAP). I saa kumi n’ebyiri z’umugoroba, ikipe ya Petro de Luanda izahura na AS Salé.

Bucyeye bw’aho ku cyumweru ku itariki ya 22 y’ukwezi kwa gatanu imikino ya kimwe cya kane k’irangiza izakomeza. Zamalek izahura na Seydou Legacy Athletic Club (SLAC) guhera i saa saba n’igice. I saa kumi n’ebyiri US Monastir izahura na Cape Town Tigers.

Imikino ya kimwe cya kabiri k’irangiza muri iyi mikino ya BAL iteganyijwe ku wa gatatu tariki ya 25 y’ukwezi kwa gatanu. Ikipe izaba yakuyemo indi hagati ya REG Basketball Club na Forces Armées et Police izahura n’izaba yarokotse hagati ya Petro de Luanda na AS Salé na ho ikipe izaba yatsinze hagati ya Zamalek na Seydou Legacy Athletic Club yo muri Gineya ikazacakirana n’izaba yakomeje hagati ya US Monastir na Cape Town Tigers. Ku wa gatanu tariki ya 27 y’ukwa gatanu hazaba umukino wo guhatanira umwanya wa gatatu, na ho umukino wa nyuma ukazaba ku wa gatandatu tariki ya 28 guhera i saa kumi n’ebyiri z’umugoroba ku isaha y’i Kigali.

Jean Claude MUNYANDINDA

 

Leave a Reply

Your email address will not be published. Required fields are marked *