Tuesday, August 9
Shadow

BAL 2022: REG Basketball Club yarangije ku mwanya wa mbere mu itsinda rya Sahara

Ku wa kabiri tariki 15 Werurwe 2022 ikipe y’Ikigo k’Igihugu Gishinzwe Ingufu REG Basketball Club yatsinze umukino wayo wa 5 ari na wo wa nyuma mu mikino yo mu itsinda rya Sahara ihita yegukana umwanya wa mbere muri iri rushanwa rya Basketball Africa League rigikomeje.

Uwo mukino wayihuje na Ferroviario da Beira yo muri Mozambike urangira REG Basketball Club itsinze 94 kuri 89. Jean Jacques Wilson Nshobozwabyosenumukiza ari mu bakinnyi bigaragaje cyane kuko yatsinze amanota 28. Mu wundi mukino wabaye kuri uyu wa kabiri, ikipe ya AS Salé yo muri Maroc yatsinze Dakar Université Club yo muri Senegali amanota 91 kuri 86.

Jean Jacques Wilson Nshobozwabyosenumukiza yarigaragaje cyane

Mu mikino itanu buri kipe yakinnye muri iri rushanwa ryaberaga i Dakar muri Senegali, ikipe ya REG Basketball Club yatsinzemo ine yayihuje na AS Salé yo muri Maroke, Seydou Legacy Athletic Club yo muri Guineya, US Monastir yo muri Tuniziya na Ferroviario da Beira yo muri Mozambike. Umukino umwe rukumbi REG Basketball Club yatakaje ni uwayihuje na Dakar Université Club yo muri Senegali yakiniraga mu rugo.

Abafana ba REG Basketball Club

Nyuma y’iyi mikino yo mu itsinda rya Sahara, ikipe ya REG ni yo iri ku isonga n’ubwo inganya amanota na US Monastir; impamvu ni uko harebwe umukino wahuje aya makipe yombi kandi REG Basketball Club ni yo yawutsinze ku manota 77 kuri 74. Ibi bisobanuye ko mu mikino ya kimwe cya kane cya kamarampaka (playoff) izatangira ku itariki ya 21 Gicurasi 2022 i Kigali mu Rwanda, REG Basketball Club izahura n’ikipe izaba yabaye iya kane mu itsinda rya Nili rizakinira i Kayiro mu Misiri kuva ku itariki ya 9 kugeza ku ya 19 Mata 2022.

Uko amakipe akurikirana nyuma yimikino yo mu itsinda rya Sahara:

1.REG Basketball Club (Rwanda)

2.US Monastir (Tuniziya)

3.AS Salé (Maroke)

4.Seydou Legacy Athletic Club (Guineya)

5.Ferroviario da Beira (Mozambike)

6.Dakar Université Club (Senegali)

Amakipe 6 azahatana mu itsinda rya Nili rizakinira mu Misiri kuva ku itariki ya 9 kugeza ku ya 19 Mata 2022:

1.Zamalek (Misiri)

2.Petro de Luanda (Angola)

3.Forces Armées et Police (Kameruni)

4.Cobra Sports (Sudani y’Epfo)

5.Cape Town Tigers (Afurika y’Epfo)

6.Espoir Fukash (Repubulika Iharanira Demokarasi ya Kongo)

Jean Claude MUNYANDINDA

 

Leave a Reply

Your email address will not be published. Required fields are marked *