Monday, August 8
Shadow

BAL 2022: REG Basketball Club yatsinze igihangange US Monastir ihita ishimangira itike ya playoffs.

Mu ijoro ryo ku wa mbere tariki 14 Werurwe 2022 ikipe ya REG Basketball Club ihagarariye u Rwanda mu itsinda rya Sahara mu irushanwa rya Basketball Africa League yatsinze US Monastir yo muri Tuniziya.

Abakinnyi ba US Monastir bayobowe na kapiteni wabo Radouane Slimane batangiye bari imbere ya REG Basketball Club ariko iyi kipe y’Ikigo k’Igihugu Gishinzwe Ingufu iza kwisubiraho mu gace ka gatatu irayigaranzura. Ibifashijwe na Adonis Filer, Dieudonné Ndayisaba, Pitchou Manga na Anthony Walker bakajije umurego ku  buryo umukino warangiye batsinze ikipe y’igihangange US Monastir amanota 77 kuri 74.

Iyi ntsinzi ya REG Basketabll Club yayifashije gushimangira mu buryo budakuka uburenganzira bwo kuzaba iri mu makipe 8 azahatana mu mikino ya kamarampaka (playoffs) ya BAL 2022 izabera mu Rwanda muri Kigali Arena i Remera kuva ku itariki ya 21 kugeza ku ya 28 Gicurasi 2022.

Elie Kajeguhakwa umwe mu bakinnyi ba REG Basketball Club

REG Basketball Club imaze gutsinda imikino 3 kuri 4 imaze gukina muri iri tsinda rya Sahara ririmo gukinira i Dakar muri Senegali. Kuri uyu wa kabiri tariki 15 Werurwe 2022 guhera i saa moya n’igice ku isaha yo mu Rwanda, irakina umukino wayo wa nyuma muri iri tsinda uza kuyihuza na Ferroviario da Beira yo muri Mozambique. REG Basketball Club niramuka itsinze uyu mukino iraba yiyongereye amahirwe yo kwicara ku mwanya wa mbere cyangwa uwa kabiri mu itsinda rya Sahara bityo muri kimwe cya kane k’irangiza cya playoffs ikazahura n’ikipe izaba yabaye iya gatatu cyangwa iya kane mu itsinda rya Nili rizakinira i Kayiro mu Misiri kuva ku itariki ya 9 kugeza ku ya 19 Mata 2022.

Jean Claude MUNYANDINDA

Leave a Reply

Your email address will not be published. Required fields are marked *