Tuesday, May 24
Shadow

Umufaransa Alan Boileau yatwaye agace ka 7 ka Tour du Rwanda

Kuri uyu wa gatandatu, mu gace ka karindwi ari na ko kabanziriza aka nyuma mu isiganwa ry’amagare Tour du Rwanda rya 2022, Umufaransa Alan Boileau wo mu ikipe ya B&B Hotels yo mu Bufaransa ni we wabaye uwa mbere mu rugendo rwo kuva i Kigali bakajya i Gicumbi bakagaruka i Kigali.

Yegukanye iyi ntera y’ibilometero 152 na metero 600 akoresheje amasaha 3, iminota 41 n’amasegonda 20. Yakurikiwe n’Umunyaisraeli Omer Goldstein ukinira ikipe ya Premier Tech yo muri Israeli wahageze hashize amasegonda atatu. Uwa gatatu yabaye Gianni Marchand wo mu ikipe ya Tarteletto Isorex yo mu Bubiligi.

Umukinnyi w’Umunyarwanda waje ku mwanya wa hafi ni Eric Manizabayo wo muri Benediction Ignite akaba yarushijwe n’uwa mbere umunota umwe n’amasegonda 12.

Ku giteranyo rusange, Umunyaeritereya Natnael Tesfazion wo mu ikipe ya Androni Giocattoli yo mu Butaliyani ni we ucyambaye umupira w’umuhondo (maillot jaune). Eric Manizabayo ni we mukinnyi w’Umunyarwanda uri ku mwanya wa hafi. Ni uwa cumi muri rusange akarushwa n’uwa mbere iminota 2 n’amasegonda 35.

Alan Boileau ni we watsinze intera ya 7 ya Tour du Rwanda

Muri aka gace ka 7 ka Tour du Rwanda abakinnyi babiri b’Abanyarwanada ari bo Rénus Uhiriwe wo mu ikipe y’igihugu Team Rwanda na Samuel Mugisha ukinira Protouch yo muri Afurika y’Epfo bavuye mu isiganwa.

Kuri iki cyumweru tariki ya 27 Gashyantare 2022 harakinwa agace ka 8 ari na ko gasoza iri siganwa Tour du Rwanda ry’uyu mwaka. Abasiganwa barazenguruka mu bice binyuranye by’umugi wa Kigali. Baragahurukira kuri Canal Olympia ku i Rebero i saa yine n’igice za mu gitondo baze gusoreza aho ngaho ku i Rebero i saa sita n’igice. Ni urugendo rw’ibilometero 75 na metero 300.

Jean Claude MUNYANDINDA

Leave a Reply

Your email address will not be published. Required fields are marked *