Saturday, January 22
Shadow

Abakinnyi 10 b’umupira w’amaguru bize bakaminuza kurusha abandi ku isi

Ntibikunze kubaho ko abakinnyi bo ku rwego rwo hejuru babigize umwuga babona umwanya wo kubifatanya n‘amasomo ngo bakomeze bige bagere ku ntera runaka y‘amashuri makuru cyangwa Kaminuza. Ikinyamakuru Besoccer cyatangaje urutonde rw‘abakinnyi 10 ba Ruhago bize bakagera ku rwego rushimishije bitabujije ko bakomeza no kwitwara neza mu nshingano zabo z‘ibanze zo gukina umupira w‘amaguru.

1.Giorgio Chiellini: Uyu myugariro w’Umutaliyani w’imyaka 37 ukinira Juventus de Turin, nyuma yo kubona impamyabumenyi yo ku rwego rwa Licence mu Bukungu n’Ubucuruzi mu mwaka wa 2010 yakuye muri Kaminuza ya Turin, yafashe umwanzuro wo kujya gukomeza amasomo ye ku rwego rwa Master’s ngo kuko zari inzozi ze kuva kera.

2.Vincent Kompany: Uyu musore w’igihagararo wamamaye cyane mu ikipe ya Manchester City nk’umukinnyi w’inyuma ubu ngubu akaba arimo gutoza ikipe ya RSC Anderlecht y’iwabo mu Bubiligi no mu mashuri yaraminuje. Kompany yabonye impamyabumenyi mu Micungire y’Ubucuruzi MBA yakuye muri Kaminuza y’i Londres ndetse anagenerwa Impamyabumenyi y’ikirenga y’icyubahiro (Honoris Causa) na Kaminuza ya Manchester. Muri iki gihe arimo arakurikira amasomo ya Doctorat mu Bukungu na Politiki Mpuzamahanga.

3.Duncan Watmore: Uyu mukinnyi w’Umwongereza ukinira Middlesbrough yamaze kubona impamyabumenyi y’ikiciro cya gatatu mu Micungire y’Ubucuruzi, akaba arimo akurikira andi masomo mu Miyoborere. Avuga ko igihe cyo gukina umupira w’amaguru ari kigufi bityo rero ngo agomba kwiga amashuri menshi ashoboka.

4.Frank Lampard: Uyu mugabo wakiniye igihe kirekire ikipe ya Chelsea yo mu Bwongereza ndetse mu minsi ishize akaba yarayibereye umutoza, yabonye impamyabumenyi ye ku myaka 17 ku ishuri rya Brentwood ndetse ibizamini yatsinze byagaragaje ko igipimo ke cy’ubwenge (Quotient Intellectuel) kiri ku rwego rwo hejuru kuko kiri hejuru ya 150.

5.Yuto Nagatomo: Uyu mukinnyi w’Umuyapani ukinira ikipe ya FC Tokyo ndetse n’ikipe y’igihugu ke yagiye anyura mu makipe menshi akomeye kandi akitwara neza, ariko ibyo ntibyamubujije no kwiga amashuri ku rwego rwo hejuru. Afite impamyabumenyi ihanitse mu Bukungu. Nagatomo amaze no kwandika ibitabo bibiri bivuga ku Bukungu Bugezweho (Modern Economics).

6.Andres Iniesta: Uyu musore w’Umunyaespagne ukinira Vissel Kobe yo mu Buyapani yamamaye cyane muri FC Barcelone no mu ikipe y’igihugu ya Espagne. Usibye kuba mwiza mu kibuga yari umunyeshuri mwiza akaba yarize amasomo y’Ibinyabuzima (Biology)

7.Juan Mata: Uyu mukinnyi w’Umunyespagne ukinira Manchester United afite impamyabumenyi ebyiri yakuye muri Kaminuza ya Camilo Jose Cela, imwe mu Bumenyi bwa Siporo (Sports Science) indi mu Iyamamazabikorwa (Marketing).

8.Simon Mignolet: Ni umunyezamu wanyuze mu makipe akomeye yo ku mugabane w’u Bulayi, muri iki gihe akaba akinira ikipe ya Club Brugge yo mu Bubiligi.Afite impamyabumenyi ihanitse muri Mategeko na Politiki yakuye muri Kaminuza ya Louvain. Mignolet avuga indimi zitandukanye zirimo Igifaransa, Icyongereza, Igiholandi n’Ikidage.

9.Romelu Lukaku: Uyu rutahizamu wa Chelsea afite impamyabumenyi ihanitse mu birebana no kunoza imikoranire n’izindi nzego (Public Relations). Lukaku avuga neza indimi eshanu.

10.Fikayo Tomori: Uyu myugariro w’imyaka 24 ukinira Milan AC ndetse n’ikipe y’igihugu y’Ubwongereza arimo gukurikira amasomo ya Licence mu Micungire y’Ubucuruzi. Avuga ko aramutse ahuye n’ingorane zitunguranye zatuma adakomeza gukina umupira w’amaguru yagobokwa n’amashuri yize.

Jean Claude MUNYANDINDA

 

 

Leave a Reply

Your email address will not be published. Required fields are marked *