Saturday, November 27
Shadow

Afrobasket 2021: Ikipe y’u Rwanda yatangiranye intsinzi

Mu irushanwa ry’Afrobasket ryatangiye kuri uyu wa kabiri i Kigali mu Rwanda, ikipe y’igihugu yu Rwanda yinjiye neza mu rugamba. Mu mukino watangiye i saa kumi nebyiri z’umugoroba ku isaha y’i Kigali, abasore b’umutoza Cheikh Sarr w’Umunyasenegali batsinze ikipe ya Repubulika iharanira Demokarasi ya Kongo amanota 82 kuri 68.

Abakinnyi b’u Rwanda barimo Dieudonn√© Ndizeye, Kenny Gasana na William Robeyns bari mu bitwaye neza muri uwo mukino.

Ni inkuru nziza ku Banyarwanda kuba ikipe yabo itangiranye intsinzi kuko bitanga amahirwe yo kuzagera mu kiciro gikurikiraho.

Mbere y’umukino wahuje u Rwanda na Repubulika Iharanira Demokarasi ya Kongo, hari habaye imikino yo mu itsinda rya kabiri. Guhera i saa yine n’igice za mu gitondo ikipe y’igihugu ya Tuniziya yahuye na Gineya. Ni umukino woroheye cyane Tuniziya kuko yakomeje kuza imbere ya Gineya guhera ku gace ka mbere k’umukino kugeza ku musozo. Tuniziya igizwe n’abagabo b’inkorokoro nka Salah Mejri, Mohammed El Mabrouk, Omar Abada, Radouane Slimane, Makhrem Ben Romdane na bagenzi babo yatsinze Gineya amanota 82 kuri 46.

U Rwanda rwatangiye neza rutsinda Kongo

Guhera i saa saba n’igice habaye umukino wahuje Misiri na Repubulika ya Centrafurika. Ikipe y’igihugu ya Misiri les Pharaons y’abasore b’intarumikwa barimo Saleh Amin, Anas Mahmoud na bagenzi babo, yagombye gutegereza agace ka kane k’umukino kugira ngo ishobore kwigobotora Repubulika ya Centrafurika yari yayiziritseho. Umukino warangiye Misiri itsinze Repubulika ya Centrafurika amanota 72 kuri 56.

Ikipe ya Cap Vert yatunguye Angola mu itsinda rya mbere iyitsinda amanota 77 kuri 71 mu mukino watangiye i saa tatu z’ijoro.

Uyu munsi ku wa gatatu irushanwa ry’Afrobasket rirakomeza. Kuri gahunda hari imikino ine, ibiri yo mu itsinda rya gatatu n’indi ibiri yo mu itsinda rya kane. Guhera i saa sita Nijeriya irahura na Mali. Ikipe y’igihugu ya Kameruni yatewe mpaga ku mukino wagombaga kuyihuza na Sudani y’Epfo guhera i saa cyenda kuko yagaragayemo abakinnyi banduye COVID 19. I saa kumi n’ebyiri Senegali irahura na Uganda hanyuma i saa tatu z’ijoro hakaza kuba umukino wa Kenya na Kote Divuwari.

Ikipe y’igihugu y’u Rwanda izongera kumanuka mu kibuga ejo ku wa kane mu mukino uzayihuzan’ikipe y’igihugu y’Angola guhera i saa kumi n’ebyiri z’umugoroba.

Jean Claude MUNYANDINDA

Leave a Reply

Your email address will not be published. Required fields are marked *