Thursday, October 21
Shadow

Barack Obama yiyongereye ku rutonde rw’abashoye imari muri NBA Africa

Barack Obama wahoze ari Perezida wa Leta Zunze Ubumwe z’Amerika na we amaze gushyira amafaranga mu mushinga w’ibikorwa bya NBA Africa.

Itangazo rya National Basketball Association (NBA) rivuga ko Obama yagize ubushake bwo gutanga umusanzu we mu kumvikanisha umugambi wa NBA wo gufasha Abanyafurika muri gahunda zirimo uburinganire n’iterambere.

Muri iri shoramari rya NBA Africa, Obama azaba afite imigabane mitoya ariko akizera ko uruhare rwe ruzagira icyo rumarira urubyiruko rwùAfurika mu bihe bizaza.

NBA Africa ni ishoramari rifite imishinga itandukanye irimo na Basketball Africa League (BAL) irushanwa riheruka kubera bwa mbere mu Rwanda mu kwezi kwa gatanu k’uyu mwaka wa 2021 rigahuza amakipe 12 meza ku mugabane w’Afurika.

Barack Obama asanzwe akunda Basketball

Intego nyamukuru y’izi gahunda za NBA Africa ni ugushakisha impano z’abakinnyi no kuzizamura hanyuma baba bamaze kugera ku rwego rwo hejuru bakagurishwa mu makipe akomeye yo muri NBA muri Leta Zunze Ubumwe z’Amerika.

Barack Obama usanzwe akunda umukino wa Basketball, yiyongereye ku bandi bantu bashoye akayabo muri uyu mushinga barimo n’abahoze bakina muri NBA bafite inkomoko muri Afurika nka Junior Bridgeman, Luol Deng, Grant Hill, Ian Mahinmi, Dikembe Mutombo na Joakim Noah.

Jean Claude MUNYANDINDA

 

Leave a Reply

Your email address will not be published. Required fields are marked *