Thursday, October 21
Shadow

Volleyball: Amateka y’ikipe ya Kaminuza y’u Rwanda

Nyuma y’uko Mukerarugendo.rw ibagejejeho amateka y’ikipe ya Groupe Scolaire y’i Butare, Seminari Nto y’i Butare ndetse n’ikipe y’igihugu muri volleyball, abasomyi bacu bakomeje kudusaba amateka y’andi makipe afite ibigwi muri uyu mukino. Mu rwego rwo kubahiriza ibyifuzo byanyu tugiye kubanyuriramo muri make ibyaranze ikipe ya volleyball ya Kaminuza y’u Rwanda.

Kaminuza y’u Rwanda ishami rya Butare yakunze kuba ku isonga mu mikino muri rusange ariko by’akarusho mu mukino w’intoki wa volleyball. Amateka yayo muri uyu mukino afite imizi mu myaka ya za 60 ikimara gushingwa ariko turahera mu mpera ya za 80 ubwo amarushanwa ku rwego rw’igihugu muri volleyball yari amaze kugera ku rundi rwego, hariho ihangana rikomeye hagati y’amakipe yari indahangarwa arimo Kaminuza y’u Rwanda ishami rya Butare, ikipe ya Minisiteri y’Ubwikorezi n’Itumanaho (MINITRANSCO), ELECTROGAZ, Groupe Scolaire y’i Butare n’ayandi.

Mu mpera ya za 80 ikipe yari imaze gushimangira igitinyiro ku buryo yahoraga ari umukandida ukomeye ku bikombe byakinirwaga mu Rwanda ibikesha abakinnyi bakomeye nka Alexandre Lyambabaje, Célestin Hakizimana wari uzwi nka Mukoni, Dominique Ngoga, Christophe Nzeyimana, Ellican Nyirishema, Bertin, Robert Bayigamba na Joseph Rwasibo. Muri ibyo bihe, mu buryo bw’imikinire byarashobokaga ko ikipe ikoresha abapasseurs babiri (n’ubu ntabwo bibujijwe ni uko budakunze kwifashishwa). Icyo gihe Bayigamba na Rwasibo ni bo bari abapasseurs hanyuma ugeze mu gice k’inyuma k’ikibuga akajya yinjira akagabura imipira, yagera imbere agatera amashoti agakora na block nk’abandi bose. Umutoza w’iyi kipe bakundaga kwita Yezu na we hari igihe yabonaga byakomeye akambara akajya mu kibuga agakina.

Bamwe mu bakinnyi ba UNR mu mpera ya za 80: kuva ibumoso ujya iburyo: Christophe Nzeyimana, Robert Bayigamba, Celestin Hakizimana aka Mukoni, Ignace Nzaramyimana aka Elastique

Mu myaka ya za 90, mu iyi kipe ya volleyball ya Kaminuza y’i Butare yiyongereyemo Ignace Nzaramyimana bahimbaga Elastique wari uturutse muri MINITRANSCO, Cléophas Nubaha utari muremure ariko wari ufite imoso ityaye kandi akanasimbuka cyane, Théophile Rwamuhizi na Benjamin Imenamikore kabuhariwe w’umucentral wari warazamukiye mu ikipe ya Seminari Nto y’i Butare akaba yarahitanywe na jenoside yakorewe abatutsi.

Mu bandi bakinnyi ikipe ya Kaminuza yari imaze kunguka mbere gato ya jenoside twavuga Théophile Minani, Alexis Rulisa na Emmanuel Bagaragaza bari bararangije muri Groupe Scolaire y’i Butare, hari kandi Mico na Safari bari abapasseurs. Kuri aba hiyongeraho Régis Murekezi uri mu bazize jenoside yakorewe abatutsi.

Nyakwigendera Benjamin Imenamikore

Ubwo Kaminuza yongeraga gufungura imiryango nyuma ya jenoside yakorewe abatutsi, ikipe ya Volleyball y’abagabo yatangiye kwisuganya, bidatinze irongera isubirana igitinyiro yahoranye ishingiye ku bakinnyi bakomeye nka Jean Pierre Karabaranga, Alexandre Lyambabaje, Alexis Rulisa, Raphaёl Ngarambe, Pacifique Kalisa, Michel Karekezi, Jean Marie Nsengiyumva, Emmanuel Ndungutse wari uzwi nka Cassius na murumuna we Eric, Patrice Rugambwa, Emmanuel Muyombano, Léandre Karekezi, Julius Kansime n’abandi.

Nyuma ya jenoside Kaminuza yongeye kwiyubaka

Bamwe muri aba bakinnyi bagendaga basohoka mu ikipe hakinjira abandi ku buryo Kaminuza yahoraga ifite impano bitewe n’uko hari hariho uburyo bwo guha imyanya y’amashuri abakinnyi bakomeye ndetse bakanishyurirwa amasomo kabone n’ubwo babaga batarabonye buruse ya guverinoma.

Abahagaze uturutse ibumoso: Jean Pierre Karabaranga, Michel Karekezi, Pacifique Kalisa, Alexis Rulisa. Abicaye: Leandre Karekezi na Alexandre Lyambabaje

Nyuma y’aho gato haje abakinnyi nka Charles Manzi Nshuti, Vedaste Ntanteteri, Jean Pierre Niyitegeka, Olivier Murekezi (yakundaga kwifashishwa n’ubwo atigaga muri     Kaminuza), Yvan Twagirashema, Gratien, Patana Murisanze, Viateur Kabirigi, Elie Mutabazi, Jean Claude Gasana, Fidèle Nyirimana, Eugène Kayijamahe na Jean Damascène Ndagijimana.

Ikipe yakomeje kugira abakinnyi b’intarumikwa ikajya ihanganira ibikombe n’abandi bakeba bayo batari boroshye barimo Kigali Volleyball Club na APR Volleyball Club.

Abandi bakinnyi binjiye mu ikipe ya Kaminuza ya volleyball bakayifasha kwitwara neza mu myaka ya za 2000 no kuzamuka ni nka kabuhariwe Eric Nsabimana bita Machine, Charles Nkurunziza, Eric Gakwaya, Jean Paul wari uvuye muri KVC, Jean Pierre Niyirora uzwi nka staff, Eric Mbonigaba, Prince Rutabikangwa, Benjamin Kangabo, Adolphe Mutoni, Florien Siborurema, Jacques, Guillaume Irakarama, Vincent Dusabimana uzwi nka Gasongo, Hervé Kagimbura, Onesphore, Olivier Ntagengwa, Ignace, Alain Ngoga, Emile Karera Dada, Alphonse Nsengiyumva, Emmanuel Mutabazi na Eugène Tuyishime.

Eric Nsabimana uzwi nka Machine

Mu bakinnyi bakomeye bakiniye Kaminuza y’u Rwanda ishami rya Butare bakaza kuvamo abatoza bakomeye twavuga Jean Pierre Karabaranga, Jean Marie Vianney Nsengiyumva, Emmanuel Ndungutse alias Cassius, Patrice Rugambwa, Elie Mutabazi, Fidèle Nyirimana na Florien Siborurema. Uruhare rwa Albert Kayiranga ufite uburambe nk’ushinzwe siporo muri Kaminuza na rwo ntawarwirengagiza mu gihe tuvuga amateka ya volleyball muri icyo kigo.

Fidele Nyirimana

Muri iki gihe urwego rwa volleyball mu mashuri makuru na kaminuza za Leta rwasubiye inyuma bityo na Kaminuza y’u Rwanda ishami rya Huye ibigenderamo ku buryo uwavuga ko volleyball yatangiye kuzima ataba agiye kure y’ukuri.

Jean Claude MUNYANDINDA

4 Comments

  • Sophie

    Nukuri ntabwo ubeshye volleyball yabaye amateka , birababaje. Noneho na zone 5 yigeze kutwibutsa byabihe nayo yarangiye burya.

  • Theodore

    Iyi nkuru ndayikunze cyane
    Urakoze muvandimwe Claude!Uzatugezeho uko urwego rwa Volleyball rwagiye ruba tumeze mu ruhando rwa Afurika kuva muri iriya myaka kugeza ubu!
    Ngirango prof Lyambabaje wenda azagira icyo akora ngo UR Igaruke mu ruhando rwa sport muri rusange na Volleyball by’umwihariko!

Leave a Reply

Your email address will not be published. Required fields are marked *