Sunday, October 17
Shadow

Kenya yegukanye igikombe cya Zone 5 muri Basketball

Ikipe y’igihugu ya Kenya ni yo yaraye yegukanye igikombe mu irushanwa rya Basketball rihuza amakipe y’abagore mu karere ka 5 k’imikino muri Afurika ryari rimaze iminsi 6 ribera muri Kigali Arena i Remera.

Mu mukino wa nyuma wabaye ku wa gatandatu tariki ya 17 Nyakanga 2021 guhera i saa kumi n’ebyiri z’umugoroba, ikipe y’igihugu ya Kenya yatsinze Misiri amanota 99 kuri 83.

Ni umukino waranzwe n’ishyaka ryinshi ku mpande zombi. Ku ruhande rumwe, Abanyamisirikazi bari bafite inyota yo gushimangira intsinzi bari begukanye imbere ya Kenya ubwo bahuraga mu gice cy’amajonjora, ku rundi ruhande Kenya na yo igashaka kwihimura kuri Misiri ngo yerekane ko ikinyuranyo k’inota rimwe yari yayirushije kitari gihagije.

Kenya yatsinze Misiri ku mukino wa nyuma.

Byaje kurangira umutoza George Mayienga wa Kenya n’abakinnyi be b’ingenzi barimo kapiteni Rose Uma, Melissa Akinyi, Mercy Wanyama na bagenzi be bateruye igikombe baragisimbiza, na ho Amer Hagar, Raneem El Gedawy, Merar Abdelgawad na bagenzi babo b’ikipe ya Misiri batahana umwanya wa kabiri.

Mbere y’uyu mukino wa nyuma, hari habaye umukino wo guhatanira umwanya wa gatatu wahuje ikipe y’u Rwanda n’iya Sudani y’Epfo. U Rwanda ni rwo rwawegukanye rutsinze Sudani y’Epfo amanota 83 kuri 56.

Nyuma yo kwegukana umwanya wa mbere muri iri rushanwa ry’akarere ka 5 k’imikino muri Afurika ryari ryahuje ibihugu bine, ikipe ya Kenya yahise ibona itike yo kuzahagararira aka karere mu irushanwa ry’Afrobasket ku makipe y’igihugu y’abagore rizabera muri Kameruni muri Nzeri uyu mwaka.

Jean Claude MUNYANDINDA

Leave a Reply

Your email address will not be published. Required fields are marked *