Saturday, October 23
Shadow

Basketball:Kenya yasezereye u Rwanda muri kimwe cya kabiri k’irangiza

Mu irushanwa ry’akarere ka gatanu k’imikino muri Afurika rihuza amakipe y’ibihugu y’abagore muri Basketball, ku wa gatanu amakipe ya Kenya na Misiri yatsindiye itike yo gukina finale iteganyijwe kuri uyu wa gatandatu.

Mu mukino watangiye i saa kumi n’ebyiri ikipe y’igihugu y’u Rwanda yatunguwe n’ikipe y’igihugu ya Kenya iyisezerera iyitsinze amanota 79 kuri 52. Abakinnyi b’Abanyakenyakazi barimo Rose Ouma ari na we kapiteni wayo, Melissa Akinyi, Victoria Reynold na Mercy Wanyama barushije mu buryo budasubirwaho Tierra Henderson, Bella Murekatete, Nicole Urwibutso, Joyeuse Sifa babihimuraho dore ko u Rwanda rwari rwatsinze Kenya mu mukino wabahuje mu kiciro kibanza aho amakipe yose uko ari ane yagombaga guhura hagati yayo.

Mu wundi mukino wa kimwe cya kabiri k’irangiza wari watangiye i saa cyenda z’igicamunsi, ikipe ya Misiri yatsinze Sudani y’Epfo amanota 99 kuri 65. Ibyavuye muri uyu mukino ntabwo byatunguranye kuko kugeza ubu ikipe ya Misiri y’umutoza Ehab El Elfy yatsinze imikino yose uko ari ine imaze gukina mu gihe Sudani y’Epfo iyobowe n’umutoza w’Umunyamerikakazi Lindsay Harding itarashobora gutsinda umukino n’umwe.

Iri rushanwa rya zone cinq muri Basketball y’abagore rirarangira uyu munsi ku wa gatandatu. Guhera i saa cyenda u Rwanda na Sudani yEpfo barahatanira umwanya wa gatatu hanyuma i saa kumi n’ebyiri hakaza gutangira umukino wa nyuma hagati ya Kenya na Misiri.

Jean Claude MUNYANDINDA

Leave a Reply

Your email address will not be published. Required fields are marked *