Monday, October 18
Shadow

Impamvu Bisate ifitanye umubano na Kalisoke na Dian Fossey Gorilla Fund

Bisate ni hamwe mu hantu Dian Fossey wari uzwi nka Nyiramacibiri yanyuraga agiye mu Birunga;ubu hateye imbere ku bufatanye na KALISOKE na Diane Gorilla Fund, hatezwa imbere uburezi  n’ibikorwa by’abahaturiye.

Ikigo cya Kalisoke gifite ibikorwa byinshi mu gukora ubushakashatsi ku ngagi no kubungabunga ibinyabuzima muri Pariki, bakanagira gahunda zo gufasha abaturiye pariki mu mibereho yabo.

Kuva 2006 bakorana n’ikigo cy’amashuri cya Bisate babafasha babaha ibikoresho by’ishuri.

Mu mwaka wa 2010 Kalisoke yabafashije kububakira ibyumba by’amashuri bitandatu, banasannye amashuri babaha n’ibigega by’amazi.

Impanvu Kalisoke ifasha ibikorwa by’iterambere bya Bisate ni uko bafitanye amateka ya kera n’imikoranire y’igihe kirekire kuko ari ho Dian Fossey yazaga agaparika imodoka agiye muri pariki y’ibirunga, abaturage baho bakamutwaza ibyo yabaga ajyanye mu ishyamba; nina ho yaguriraga ibintu yabaga akeneye.

Mu mwaka wa 2015 bubakiwe isomero bahabwa za mudasobwa bizafasha abanyeshuri baho gukura bakunda kubungabunga urusobe rw’ibinyabuzima n’ibidukikije.

Ese Kalisoke na Dian Fossey Gorilla Fund ni iki?

Dian Fossey Gorilla Fund ni ikigo cya Nyiramacibiri cyashyizweho mu rwego rw’ ubushakashatsi ku ngagi zo mu Birunga mu 1967.

Abayobozi b’ikigo cy’ubushakashatsi no kubungabunga ingagi n’urusobe rw’ibinyabuzima muri Karisoke ishami rya Fondasiyo Dian Fossey Gorilla Fund batangaza ko Kalisoke ari ikigo cy’ubushakashatsi ku ngagi zo mu Birunga gikorera ibikorwa muri Pariki y’ Ibirunga bagakurikirana ubuzima bwa buri munsi bw’ingagi.

Baragira bati “tubungabunga ubuzima bw’ ingagi zo muri Pariki y’Ibirunga, tugakora ubushakashatsi tunabungabunga ibindi binyabuzima birimo”.

Mu buzima bwa buri munsi, Dian Fossey Gorilla Fund bafatanyije n’Ikigo cy’Igihugu cy’Iterambere (RDB) basobanurira abaturage uburyo bagomba kuzibungabunga, hirindwa ba Rushimusi, banasobanurira abanyeshuri ku bigo by’amashuri kubungabunga urusobe rw’ibinyabuzima.

Abakozi bashinzwe ubuzima bwazo umunsi ku munsi na bo bakora raporo ya buri munsi bakerekana uko ziriwe, mu gihe zirwaye bakazivura.

Marie Chantal Nyirabera

 

 

Leave a Reply

Your email address will not be published. Required fields are marked *