Wednesday, October 21
Shadow

Amwe mu mateka y’umukino wo gusiganwa ku magare mu Rwanda

Umukino wo gusiganwa ku magare mu Rwanda umaze kugera ku rwego rushimishije mu ruhando mpuzamahanga. Uyu mukino watangiye mu Rwanda mu myaka ya za 70 uza kugenda utera imbere buhoro buhoro muri iki gihe ukaba ugeze ku ntera ya 2.1 ku rutonde rw’amarushanwa mpuzamahanga hakurikijwe ubusumbane bwayo.

Amarushanwa nyirizina yatangiye gutegurwa mu mpera ya za 1970 no mu ntangiriro ya za 1980. Muri yo twavuga nk’isiganwa Tour de Kigali ryazengurukaga umugi wa Kigali, Tour de l’Est rya Rwamagana – Rusumo, Tour des Volcans ryerekezaga mu majyaruguru, Ascension des Mille Collines ryavaga i Kigali rikanyura mu mugi wa Butare rigasoreza ku Kanyaru na Traversée de Nyungwe ryerekezaga i Rusizi.

Mu mwaka wa 1988 hatangiye isiganwa ry’amagare rizenguruka igihugu Tour du Rwanda. Icyo gihe ryegukanywe na Célestin Ndengeyingoma wabarizwaga mu ikipe ya Ciné Elmay. Kuri iyi nshuro ya mbere haserutse abakinnyi b’Abanyarwanda gusa. Ku nshuro ya 2 ndetse n’iya 3 za Tour du Rwanda hatumiwe n’abakinnyi bo muri Uganda, u Burundi, Kenya na Repubulika iharanira Demokarasi ya Kongo (Zayire). Bamwe mu basomyi bacu mushobora kuba mwibuka abakinnyi nka Hamisi Mobange na Kimoto Selenge b’Abanyekongo bagerageje kwitwara neza muri Tour du Rwanda bagasigara mu mitima y’Abanyarwanda benshi. Mu baterankunga b’iri rushanwa harimo n’umucuruzi Assinapol Rwigara binyuze mu itabi rya Sweet Menthol (SM).

Faustin Mparabanyi watsinze Tour du Rwanda ya 1990 muri iki gihe ni umujyanama mu ishyirahamwe FERWACY

Nyuma y’umwaka wa 1990 Tour du Rwanda yarahagaze yongera gusubukurwa mu mwaka wa 2001. Kuva muri 2001 kugeza muri 2008 iri siganwa ryegukanywe n’abakinnyi b’abanyarwanda usibye muri 2006 ryatwawe n’Umunyakenya Peter Kamau.

Abraham Ruhumuriza yatwaye Tour du Rwanda inshuro 5

Guhera mu mwaka wa 2009, Tour du Rwanda yashyizwe ku ngengabihe y’amasiganwa yemewe n’Ishyirahamwe Mpuzamahanga ry’Umukino wo Gusiganwa ku Magare (Union Cycliste Internationale) ku kiciro cya 2.2. Nyuma y’imyaka runaka abakinnyi b’Abanyarwanda badashobora kwegukana Tour du Rwanda yo kuri uru rwego bashoboye kubigeraho guhera mu mwaka wa 2014 babimburiwe na Valens Ndayisenga.

Valens Ndayisenga ni we wegukanye bwa mbere mu bakinnyi b’Abanyarwanda Tour du Rwanda ya 2.2

Kuva mu mwaka wa 2019 Tour du Rwanda yongeye kuzamurirwa urwego ishyirwa kuri 2.1. Abakurikiranira hafi umukino wo gusiganwa ku magare baribaza niba Umunyarwanda ashobora kuzagira atya akegukana iri siganwa ryo kuri iki kiciro dore ko noneho hasigaye haseruka amakipe y’ibisumizi harimo ndetse n’asanzwe aseruka mu isiganwa rya mbere ku isi Tour de France.

Muri rusange abakinnyi bakomeye b’Abanyarwanda bigaragaje mu minsi ya vuba ni nka Abraham Ruhumuriza, Adrien Niyonshuti, Nathan Byukusenge, Obed Ruvogera, Uwimana Rafiki, Joseph Biziyaremye, Hadi Janvier, Valens Ndayisenga, Jean Bosco Nsengimana, Gasore Hategeka, Joseph Aleluya, Samuel Mugisha, Bonaventure Uwizeyimana, Jean Claude Uwizeye n’abandi. Mu myaka yo hambere abakinnyi b’intarumikwa u Rwanda rwari rufite harimo Fidele Uwizeye, Emmanuel Turatsinze, Ferdinand Sebera, Célestin Ndengeyingoma, Bernard Nsengiyumva, Omar Masumbuko, Alphonse Nshimiyimana, Faustin Mparabanyi n’abandi.

Abakinnyi begukanye Tour du Rwanda

1988: Celestin Ndengeyingoma
1989: Omar Masumbuko
1990: Faustin Mparabanyi
2001: Bernard Nsengiyumva
2002, 2003, 2004 na 2005: Abraham Ruhumuriza
2006: Peter Kamau (Kenya)
2007: Abraham Ruhumuriza
2008: Adrien Niyonshuti
2009: Adil Jelloul (Maroc)
2010: Danel Teklehaimanot Girmazion (Eritreya)
2011: Kiel Reijnen (USA)
2012: Darren Lill (Afurika y’Epfo)
2013: Dylan Girdlestone (Afurika y’Epfo)
2014: Valens Ndayisenga
2015: Jean Bosco Nsengimana                                                                                                                                  2016: Valens Ndayisenga                                                                                                                                                2017: Joseph Aleluya                                                                                                                                                  2018: Samuel Mugisha                                                                                                                                              2019: Merhawi Kudus (Eritreya)                                                                                                                                    2020: Natnael Tesfazion (Eritreya)

Jean Claude MUNYANDINDA

Leave a Reply

Your email address will not be published. Required fields are marked *