Wednesday, October 21
Shadow

Kwita izina 2020: abana 24 b’ingagi bazahabwa amazina hiyambajwe ikoranabuhanga

Ubuyobozi bw’Ikigo k’Igihugu k’Iterambere (RDB) bwatangaje ko umuhango wo Kwita Izina abana b’ingagi uyu mwaka uzaba hakoreshejwe ikoranabuhanga mu rwego rwo kwirinda icyorezo cya virusi ya Corona. Abana 24 b’ingagi ari bo bazitwa amazina mu muhango uteganyijwe ku wa 24 Nzeri 2020

Igikorwa cyo Kwita Izina gisanzwe kitabirwa n’abashyitsi bo mu gihugu imbere, ingagi ziba zavutse buri mwaka zigahabwa izina, mu muhango umaze kumenyerwa kandi ufite uruhare mu kumurikira amahanga ibyiza u Rwanda rufite mu bukerarugendo.

Gusa uyu mwaka kubera icyorezo cya Coronavirus, uyu mwaka iki gikorwa kizaba hifashishijwe ikoranabuhanga. Umunsi kizaberaho uzahurirana n’umunsi mpuzamahanga wo kwita ku ngagi ukaba n’umunsi impirimbanyi mu kwita ku ngagi Dian Fossey, yashingiyeho ikigo Karisoke Research Centre mu mwaka wa 1967.

Umuyobozi ushinzwe ubukerarugendo muri RDB, Bélyse Kaliza Belise ku wa gatanu tariki 6 Nzeri 2020 yatangaje ko uyu mwaka Kwita Izina bifite umwihariko wo kuba bizakorwa n’abantu b’imbere mu gihugu biganjemo abari mu bikorwa byo kubungabunga ingagi.

Yavuze ko abazagira uruhare muri icyo gikorwa barimo abaganga bazo, abarinda pariki, abayobora ba mukerarugendo mu bikorwa byo kuzisura n’abandi baharanira kwita ku ngagi iminsi yose.

Yakomeje asobanura ko uyu mwaka mu Kwita Izina hazazirikanwa ku kurengera ibidukikije.  Yagize ati “Uyu mwaka tuzifatanya na bagenzi bacu baba bari muri pariki buri munsi bita ku ngagi n’ibindi bidukikije”.

Yakomeje avuga ko hazategura ibiganiro ku bufatanye n’abikorera byiga ku kubungabunga urusobe rw’ibinyabuzima muri iki gihe k’icyorezo cya Virus ya Corona, kuzahura ubukerarugendo n’ibindi. Ibyo biganiro bizitabirwa n’abahanga, abashakashatsi, ababungabunga ibidukikije, abafata ibyemezo n’abikorera”.

Ubukerarugendo ni rumwe mu nzego zifatiye runini ubukungu bw’ u Rwanda kuko mu mwaka wa  2019 mu musaruro mbumbe wose w’igihugu, bwari bufitemo 10% kandi na mbere yaho umusaruro w’ibyo igihugu cyinjiza biturutse mu bukerarugendo wagiye wiyongera kuva mu 2008 kugera mu 2019.

Mu 2019, ubukerarugendo bwinjirije u Rwanda miliyoni 498 z’amadolari y’Amerika, angana hafi na miliyari 490 mu mafaranga y’u Rwanda, intego y’umwaka wa 2024 ikaba ari ukwinjiza miliyoni 800 z’amadolari y’amerika.

Jean Claude MUNYANDINDA

 

Leave a Reply

Your email address will not be published. Required fields are marked *