Wednesday, October 21
Shadow

Bamwe mu bakinnyi b’Abanyarwanda bakinnye mu kiciro cya mbere mu mikino irenze umwe

Si kenshi umukinnyi umwe ashobora kwisanga afite impano zirenze imwe mu gukina umukino runaka. N’iyo bibaye usanga hari umukino umwe aba ashoboye ku rwego rwo hejuru, mu wundi bikaba ari nko kugerageza. Mukerarugendo.rw yifuje kubagezaho bamwe mu bakinnyi bo mu Rwanda bashoboye gukina ku rwego rwo hejuru mu mikino ibiri itandukanye ndetse bakinira amakipe yo mu kiciro cya mbere.

1.Samson HARERIMANA: Uyu mukinnyi abantu benshi ntibamuzi. Mbere ya Jenoside yakorewe abatutsi yakinaga mu ikipe y’umupira w’amaguru ya Pantheres Noires y’abasirikare b’u Rwanda icyo gihe. Yari umunyezamu, gusa izina rye ntiryamamaye nk’iry’abamubanjirije muri iyo kipe nka  Ngeze ndetse na Onesphore Ngabonzima. Samson ntabwo yakinaga umupira w’amaguru gusa. Yari n’umukinnyi wa Volleyball  mu ikipe yitwaga Ouragan VC yari iya Banki Nasiyonali y’u Rwanda; yakinaga hagati ku mwanya w’abakora urukuta rw’ibanze bakanakina imipira yihuse (central).  Uyu mukinnyi nta  igihagararo nta gihagararo gikanganye gisabwa aba bakinnyi b’abacentraux yari afite ariko yari azwiho gusimbuka cyane kandi vuba (détente).

2.Jean de Dieu Masumbuko: Uyu mugabo azwi nk’umutoza w’umukino w’intoki wa volleyball. Yabaye umukinnnyi ukomeye muri uwo mukino mu makipe nka Seminari Ntoya yo ku Karubanda, Groupe Scolaire y’i Butare na Kigali Volleyball Club KVC. Uyu mugabo yari azwiho gukinana ubwenge n’amayeri menshi akamenya gukwepa block y’uwo bahanganye kandi uburebure bwe nta bwo bwari bukanganye. Ikindi kintu yari ashoboye ni ugukora défense na services zirimo imibare myinshi. Mu gusoza carrrière ye yo gukina volleyball yakinaga ku mwanya wa libero.

Masumbuko Jean de Dieu yambaye nimero 9. Iki gihe yakinaga mu ikipe ya Seminari Ntoya Virgo Fidelis yo ku Karubanda

Abantu benshi bamuzi muri volleyball ariko igitangaje ni uko yanakinnye football mu ikipe ya Mukura Victory Sport yo mu mugi wa Butare ari na ho avuka. Masumbuko yakinaga nka Rutahizamu kuri nimero 9. Muri iyi kipe ya Mukura VS, yakinanye n’abavandimwe be ari bo Kizito Rubashumukore, Martin Ntwari uzwi nka Gashubi na Nyakwigendera Innocent Mutuyimana.

Ubu ni umutoza wa Volleyball

3.Claudette Mugwaneza Habimana : Uyu mutegarugori ni umutoza wungirije mu ikipe y’igihugu y’u Rwanda y’abagore mu mukino wa Basketball akaba n’umujyanama mu bya technique mu Ishyirahamwe ry’Umukino w’Intoki wa Basketball mu Rwanda FERWABA. Abenshi bamuzi ku kazina ka Bucumu. Yakinnye igihe kirekire Basketball na Volleyball ku rwego rwo hejuru ndetse agera mu ikipe y’igihugu muri iyo mikino yombi. Muri Volleyball yakiniye les Colombes VC, Kigali Volleyball Club KVC, UNR CV, APR VC na Rwanda Revenue Authority.  Amakipe ya Basketball Bucumu yanyuzemo ni Etoile Basketball Club, UNR Basketball club na APR Basketball Club.

Claudette Mugwaneza Habimana uzwi nka Bucumu

Aba bakinnyi ni bo twashoboye kubabonera nka Mukerarugendo.rw. Birashoboka ko nkamwe abasomyi bacu mwaba muzi n’abandi tukaba twabongera ku rutonde. Gusa hari n’abandi tuzi bagiye bagaragaza impano mu mukino runaka, bakaba bashobora no gukina neza undi mukino ariko atari ku rwego rwo hejuru. Izi ni ingero z’abakinnyi ba volleyball bari bakomeye bagera no mu mupira w’amaguru bakihagararaho: Olivier Murekezi, Michel Karekezi, Alphonse Bayingana, Alexis Mbaraga, albert Kayiranga, Julius Kansime n’abandi.

Tugarutse ku bakinnyi  bafite impano zirenze imwe, mu gusoza tunyarukire mu Burundi hari umukinnyi witwa Gynette Kamwemwe ukina mu ikipe y’igihugu mu mikino itatu yose ari yo Football, Basketball na Volleyball.

Umurundikazi Gynette Kamwemwe akina mu ikipe y’igihugu y’u Burundi muri Football, Volleyball na Basketball

Jean Claude MUNYANDINDA

Leave a Reply

Your email address will not be published. Required fields are marked *