Wednesday, October 21
Shadow

Rayon Sport: Waba wibuka abakinnyi 11 babanje mu kibuga ubwo yasezereraga El Hilal mu 1994?

Muri gahunda twiyemeje yo kubasangiza amakuru y’ukuri no kwibukiranya amateka yaranze imikino mu Rwanda, turabagezaho urutonde rw’abakinnyi 11 batangiye mu kibuga mu mukino wo kwishyura wabereye i Kigali Rayon Sports igatsinda El Hilal yo muri Sudani ibitego 4 kuri 1 mu mukino wo kwishyura mu guhatanira igikombe cy’Afurika ku makipe yatwaye ibikombe iwayo Cup Winners’ Cup mu gihe El Hilal yari yatsinze Rayon Sport igitego kimwe ku busa mu mukino ubanza. Gusa Rayon sport nta bwo na yo yashoboye gukomeza mu kiciro gikurikiraho kuko mu Rwanda hahise haba jenoside yakorewe abatutsi bigatuma ikipe ya Kenya Breweries bagombaga guhura ari yo yikomereza.

MURANGWA Eugene: Uyu ni we wafatiraga Rayon Sport muri icyo gihe. Yarangwaga no gukinana ingofero y’urukinga. Murangwa yaje gutoroka ikipe y’igihugu Amavubi mu mwaka wa 1996 mu Bufaransa ubwo bari bavuye muri Tunisiya mu mukino wo kwishyura mu majonjora y’ikubitiro mu gushakisha itike yo kujya mu gikombe cy’isi. Ubu abarizwa mu Bwongereza akaba yaratangije n’ikigega cy’abahoze bakina umupira bagamije guteza imbere abana muri ruhago.

HATEGEKIMANA Dieudonné: Yakinaga kuri nimero kabiri, ni ukuvuga inyuma ku ruhande rw’iburyo. Uyu mukinnyi yabanje gukina muri STIR FC mbere yo kwerekeza muri Rayon Sport. Bari baramuhimbye akazina ka Ninja. Uyu mukinnyi yitabye Imana akaba ari se wa Yves Kimenyi umunyezamu w’ikipe ya Kiyovu Sport.

Hategekimana Dieudonne Ninja ni uwa 2 uhereye iburyo mu bapfukamye

KAZANENDA Francois: yakinaga ibumoso inyuma. Amakuru agera kuri Mukerarugendo.rw avuga ko uyu mugabo aherereye mu ntara y’i Burasirazuba

HAMISSI Aimé: bamwitaga Dollar. Akomoka muri Repubulika iharanira Demokarasi ya Kongo. Yakinaga mu mutima wa ba Myugariro. Yari umukinnyi w’inzobe akaba yari azwiho kumenya kurengura cyane. N’igitego cya mbere  Rayon Sport yatsinze muri uyu mukino cyaturutse ku kurengura kwe ahereza Jean de Dieu Mateso. Yaje guca inkereramucyamo ava muri Rayon yerekeza mu Bubiligi ari na ho yasoreje ibyo gukina Ruhago.

KALISA Claude: Uyu mugabo na we ukomoka muri Repubulika iharanira Demokarasi ya Kongo yaje muri Rayon Sport nyuma y’igihe gito yari amaze muri Espoir FC mu myaka ya za 90. Raoul Shungu ni we wamuzanye mu ikipe. Azwiho kuba yari umukinnyi ukina atuje, utarangwaho no kuvunana cyangwa gusunikana. Yakinaga nka myugariro wa nyuma(libero) haba muri Rayon Sport haba no mu ikipe y’igihugu Amavubi. Kalisa Claude yatorotse ikipe y’igihugu mu mwaka wa 1996 aza gukina mu makipe atandukanye yo mu Bubiligi ndetse yigeze no gukina mu Bushinwa aza no kugaruka igihe gito muri Rayon Sport. Yasoreje umupira mu Bubiligi amaze kuzahazwa n’imvune ikomeye yagize u Rwanda rwakinnye na Namibiya. Mu misoreze ye, ikipe ya Saint Trond yo mu Bubiligi yari yaramuhaye akazi ko gucunga ibikoresho by’ikipe. Kalisa avukana na Habimana Batu Jean wigeze gukinira Kiyovu Sport na Rayon Sport hanyuma na we akaza kujya i Bulayi atorotse ikipe y’igihugu Amavubi.

BUREGEYA Anastase: bari baramuhimbye Masaka. Yitabye Imana mu 1994.Yari umukinnyi uzamutse vuba ariko agirirwa icyizere n’umutoza kubera kumenya gukoresha ingufu, kumenya kwambura umupira no gutanga amapasses meza. Yakinaga nk’umukinnyi wo hagati ufasha ab’inyuma.

MUDEYI Nazaire: Ni umwe mu bana bakomoka mu muryango umwe bakinnye umupira ku rwego rushimishije. Avuka kuri Mudeyi Modeste akagira abavandimwe be ari bo Muvara Valens, Mudeyi Gustave, Mudeyi Emilien witabye Imana na Mudeyi Yves. Nazaire Mudeyi yari rutahizamu ushoboye. Muri iki gihe atuye mu Bubiligi.

GASANGWA Celestin: Yakinaga hagati kuri nimero 8. Bakunda kumwita Tigana. Yakiniye cyane ikipe ya Mukura Victory Sport. Amacenga ye yatumye hari bamwe bamuha akabyiniriro ka Bazungu. Abavandimwe be Rudasingwa Justin bitaga Gaturira na Rutegazihiga Martin bazize jenoside yakorewe abatutsi mu mwaka wa 1994. Ubungubu  Tigana abarizwa mu kerere ka Huye mu ntara y’amajyepfo.

MATESO Jean de Dieu: Yakinaga hagati ariko anasatira izamu. Ni we watsinze igitego cyo kwishyura El Hilal, kiba n’urufunguzo rwo gutsinda ibindi bitatu byasezereye Abanyasudani kuri Stade Amahoro i Remera. Mateso Jean de Dieu aheruka gusezererwa mu ikipe y’As Kigali aho yari amaze iminsi ari umutoza wungirije.

KAYIRANGA Jean Baptiste : Ni umwe mu bakinnyi Rayon Sport yagize bazi gukinisha amaguru yombi bafite n’amacenga. Yakiniye iyi kipe igihe kirekire aza no kujya muri Tuniziya nk’uwabigize umwuga. Aho agarukiye mu Rwanda yakiniye Rayon Sport igihe gito aza no kuyibera umutoza. Yashoboye no kuyihesha igikombe kimwe cya shampiyona n’icy’Amahoro. Yatoje kandi AS Kigali, Kiyovu, Sport, Gicumbi FC, Mukura VS, Pepiniere FC,  ndetse aba inshuro nyinshi umutoza wungirije mu ikipe y’igihugu Amavubi. Ubu ni Directeur Technique mu ikipe ya Rayon Sport.

MBUSA Kombi Billy : Akomoka muri Repubulika iharanira Demokarasi ya Kongo.Yakinaga asatira izamu. Yaje muri Rayon Sport ahita yemeza abantu kubera ubuhanga bwe bwo gutsindisha ubwenge. Azwiho kumenya guhagarara neza kuburyo byagoraga ab’inyuma b’indi kipe kumenya kumuhagarika. Billy yakiniye kandi ikipe ya les Citadins aza no kuba umutoza wa Esperance yo ku Kimisagara ndetse n’umutoza wungirije mu ikipe ya Rayon Sport.

Usibye aba bakinnyi b’indobanure icyo gihe Rayon Sport yari ifite n’abandi ba Karahabutaka barimo Zapi Kakule utarakinnye uwo mukino kubera ikarita y’umutuku, hakaba Jean Chrysostome Sembagare, Celestin Ndayambaje bitaga Misiri, Longin Munyurangabo, Aloys Byungura n’abandi…

Jean Claude MUNYANDINDA

 

Leave a Reply

Your email address will not be published. Required fields are marked *