Wednesday, October 21
Shadow

Ibihembo bya Salax bigiye gutangwa ku nshuro ya munani

Ku nshuro ya munani hagiye kongera gutangwa ibihembo bya Salax bigenerwa abahanzi baba barakoze cyane kurusha abandi mu gihe cy’umwaka.

Muri uyu mwaka ubuyobozi bwa AHUPA isanzwe itegura iki gikorwa bwatangaje ko buzabitanga mu Ukuboza 2020.

Ahmed Pacifique, Umuyobozi wa AHUPA itegura Salax Awards yabwiye IGIHE ko ibi bihembo bizatangwa mu Ukuboza 2020.

Ati” Ubushize twabiteguye muri Werurwe, twasanze byaba byiza bishyizwe mu mpera z’umwaka kugira ngo tujye duhemba umuhanzi witwaye neza muri uwo mwaka cyane ko uba uri kurangira.”

Uyu mugabo yavuze ko bahisemo gushyira ibi bihembo mu Ukuboza kugira ngo bihe umwanya uhagije wo kureba uburyo abahanzi bazaba bitwaye mu gihe cy’amezi abanza.

Ni ku nshuro ya munani ibi bihembo bigiye gutangwa nyuma y’uko bitangiye mu 2009.

Ahmed yavuze ko nubwo icyorezo cya Covid-19 cyakomeza, itangwa ry’ibi bihembo ritahagarara kuko hari uburyo bwo kuba byatangwa hifashishijwe ikoranabuhanga nkuko ibitaramo biri gukorwa muri ibi bihe.

Ibijyanye n’uburyo ibi bihembo bizatangwa ndetse n’abazabihatanira kimwe n’impinduka zishobora kugaragaramo, yavuze ko bizamenyekana mu gihe gito kiri imbere.

Ibihembo bya Salax byaherukaga gutangwa tariki 31 Werurwe 2019, Bruce Melodie niwe wegukanyemo ibihembo byinshi nyuma yo gucyura bitatu mu icumi byatanzwe. Icyo gihe byari bimaze imyaka itatu bidatangwa.

Leave a Reply

Your email address will not be published. Required fields are marked *