Tuesday, November 24
Shadow

Abarwayi ba COVID-19 batangiye kuvurirwa mu ngo zabo bitabwaho bate?

Umuyobozi Mukuru w’Ikigo cy’Igihugu cy’Ubuzima, Dr Nsanzimana Sabin, yatangaje ko imibare y’abasangwamo Coronavirus ubu izamuka uko iminsi ihita indi igataha, ku buryo abo bigaragara ko badafite ibimenyetso bashobora kuvurirwa mu ngo zabo.

Kuri uyu wa Gatandatu nibwo Minisiteri y’Ubuzima yatangaje ko abantu 109 basanzwemo Coronavirus, ndetse Dr Nsanzimana yavuze ko nyuma y’iyo mibare, abantu “ntibibatungurwe n’uyu munsi cyangwa ejo tubonye imibare itari hasi y’ibyo dusanzwe tubona”.

Ni imibare ngo ishingiye ku burwayi bukomeje kwiyongera mu Mujyi wa Kigali, nk’uko yabitangaje mu kiganiro Urubuga rw’Itangazamakuru.

Yakomeje ati “Aya masoko twabonyemo uburwayi mu Mujyi wa Kigali, twapimye hafi abantu barenga 6000 mu bipimo byafashwe mu minsi itarenga itanu ishize, abo bose rero niho hari guturuka aba barwayi turimo kubona, nko mu bo twabonye ejo 109, nka 80% muri bo bari baturutse muri aya masoko n’abo bahuye nabo.”

Dr Nsanzimana yavuze ko nibura mu bantu 100 baboneka barwaye COVID-19, 85% baba batagaragaza ibimenyetso, ku buryo bakeneye gukurikiranwa byoroheje gusa kugira ngo bataremba, kuko nta bimenyetso baba bagaragaza.

Ibyo byatumye hatekerezwa uburyo nk’umuntu ufite urugo rumwemerera kwishyira mu kato ntagire abandi bantu bahura ku buryo yabanduza, bitakiri ngombwa ko ashyirwa mu bitaro, ahubwo akaguma mu rugo iwe.

Yakomeje ati “Barahari uyu munsi nka Rusizi, hari 20 bamaze gukira bakiriye iwabo mu rugo. Umuntu udafite ibimenyetso uyu munsi, afite ahantu aba ashobora kwishyira mu kato, ntiyanduze abo mu rugo cyangwa abaturanyi, turamuha uburyo bwo kuvurirwa mu rugo.”

“Arakurikiranwa, hari akantu tumwambika kugira ngo atazajya azerera akajya kwanduza abandi, ni agasaha keza, karanabara, ukabikurikirana, utazamubwira ngo guma mu rugo ejo ukabona atwaye moto Kimironko cyangwa yaje gukoresha ikiganiro mu itangazamakuru. Barakize i Rusizi, barakize hano i Kigali, bakiriye mu ngo zabo. Abo rero kubakurikirana ni ngombwa, kuko hari abagize umuriro, hari utangira kubura umwuka akaguhamagara akakubwira ati nubwo ndi mu rugo ariko nimutabare bimeze nabi, mukagenda mukamufata, mukajya kumuha umwuka.”

Ibyo ngo bizatuma mu mavuriro hashyirwamo ba bandi 15% baba bagaragaza ibimenyetso bya COVID-19, ku buryo bataba umutwaro ku rwego rw’ubuzima.

Dr Nsanzimana yavuze ko bikenewe ko abantu barushaho kwirinda iki cyorezo bakaraba intoki, bakambara agapfukamunwa neza kandi bagahana intera hagati yabo.

Ni icyorezo avuga ko cyica, kuko abantu 11 mu Rwanda kimaze kubahitana, ahanini bitewe n’uko bagenda bandura iyi virus bafite ubundi burwayi.

Dr Nsanzimana yakomeje ati “Abantu 11 bose bamaze gupfa bafite ikintu bahuriyeho, bari bafite ibibazo by’uburwayi bari basanganwe. Kenshi usanga ni abantu barwaye indwara y’isukari (diabète), indwara zitandukanye zijyana n’izabukuru, hari indwara z’ubuhumekero nka za asthma, ni yo mpamvu bavuga ko mu kuvura COVID-19 ukenera umwuka wa oxygène, hakiyongeraho n’ikibazo cy’umubyibuho ukabije. Ntabwo dukunda kukivuga ariko mu barwayi tumaze gutakaza harimo babiri bari bafite icyo kibazo.”

Agaruka ku bikorwa bikomeje guha icyuho COVID-19, Dr Nsanzimana yavuze ko harimo utubari, n’abantu bakunze kugenda mu masaha y’ijoro ku mpamvu zinyuranye, bagafatwa bagashyirwa muri stade ngo bigishwe.

Yakomeje ati “Twagiye kubapima, njye ku giti cyanjye nagiyeyo, navuyeho hafi saa Saba z’ijoro n’ikipe y’abaganga twari kumwe, twafashe ibipimo 188 iryo joro, bukeye dusanga 4% by’abafatwa muri aya masaha y’ijoro twabasanzemo COVID-19, bari bafite ubwo burwayi. Ishusho yari irimo ni iyihe? Ba bantu bakunze kugenda ijoro, bakunda kutubahiriza aya mabwiriza, hashobora kuba hari ikintu bahuriyeho cyangwa se hari imyitwarire yabo ishobora kugeza mu burwayi.”

Kugeza ubu Minisiteri y’Ubuzima imaze kugeza ku bushobozi bwo gupima abantu hagati ya 5000-10 000, ndetse kuri uyu wa Gatandatu hafunguwe laboratwari ebyiri nshya zipima COVID-19, ku buryo buri ntara mu Rwanda yahawe ubu bushobozi bwo gupima iki cyorezo.

Kugeza ubu kandi u Rwanda rwatangiye gukoresha uburyo bwo gupima byihuse (rapid tests), bitanga igisubizo cyizewe kuri 82%.

Ni uburyo bushobora no gutuma mu minsi mike abajyanama b’ubuzima batangira gupima iki cyorezo, cyangwa ku mavuriro n’ibigo nderabuzima.

Kugeza ubu abamaze gusangwamo COVID-19 ni abantu 2889, abakize ni 1754 naho abakirwaye ni 1124.

 

Leave a Reply

Your email address will not be published. Required fields are marked *